Sports Complex sa Arayat pinasinayaan
Pinasinayaan na ang bagong sports complex sa Barangay Poblacion sa bayan ng Arayat nito lamang Linggo, ika-13 ng Marso.
Sa pangunguna nina 3rd District Representative Aurelio “Dong” Gonzales, Jr., Arayat Mayor Emmanuel “Bon” Alejandrino at asawa nitong si Madir Alejandrino, at 3rd District Board Member Jun Canlas, na kumatawan kay Governor Dennis “Delta” Pineda, isininagawa ang blessing at ribbon-cutting ceremony na pinangasiwaan ni Rev. Fr. Mark Manabat.
Ang naturang sports complex na nagkakahalaga ng humigit-kumulang sa P10-million ay pinondohan ni Rep. Gonzales.
“Pina-rehab ko ‘yan, pina-aircon ko, pinabago ko lahat. Thru our partnership with Mayor Bon at kumareng Madir, pinagawa namin ‘yan,” ani Representative Gonzales.
Ayon kay Mayor Alejandrino, nagsimula lamang ang proyekto sa biruan nilang dalawa ni Rep. Gonzales. Mula sa pagiging simpleng covered court ay isinaayos nila ito at ginawang sports complex.
“Noong una, nagbibiruan lang kami. Pero ayon, pagkatapos ng isang linggo, inumpisahan na.”
Dagdag pa ng alkalde,malaking bagay raw ang sports complex para sa mga mamamayan ng Arayat, dahil hindi na nila kailangan pang manghiram sa iba sa tuwing mayroong isinasagawang aktibidad sa bayan.-
Mga larawang kuha ni Jun Jaso / Pampanga PIO
