Ipinabatid ng Pamahalaang Lungsod ng Angeles na mas paiigtingin ang pagpapatupad ng mga alituntunin sa ilalim ng Safer Cities Initiative ng DILG upang mapanatili ang kaayusan, disiplina, at kaligtasan sa komunidad.

Bawal ang Pag-Inom sa Kalsada
Mahigpit na ipinagbabawal ang pag-inom ng alak sa kalsada at iba pang pampublikong lugar, kabilang ang paglalagay ng mesa at silya sa bangketa o lansangan para sa inuman, upang maiwasan ang abala at mapanatili ang maayos na daloy ng trapiko.

Bawal ang Topless sa Kalye
Ipinatutupad din ang maayos at disenteng pananamit sa publiko. Hindi pinahihintulutan ang pagiging topless sa mga pampublikong lugar bilang bahagi ng pagpapanatili ng respeto at kaayusan.

Videoke Curfew: 10PM
Para sa kapayapaan ng komunidad, ipinatutupad ang videoke curfew simula alas-10 ng gabi, kung saan ipinagbabawal ang paggamit ng videoke at malalakas na sound system sa labas ng tahanan upang maiwasan ang ingay na nakakaabala sa iba.

Bawal gumala ang mga menor de-edad lampas 10PM
Ipinagbabawal din ang paglabas ng mga menor de edad lampas alas-10 ng gabi kung walang kasamang magulang o nakatatanda.

Hinihikayat ang publiko na makiisa at sumunod sa mga alituntunin upang mapanatili ang isang ligtas, maayos, at mapayapang Angeles City para sa lahat.