PABAHAY PARA SA MGA AETA SA PORAC

Patuloy na isinusulong ng Pamahalaang Panlalawigan ng Pampanga ang pagkakaloob ng pabahay para sa mga katutubong Aeta sa bayan ng Porac, kung saan itinuturing ang lupa hindi lamang bilang ari-arian kundi bilang tahanan, kabuhayan, at bahagi ng kanilang pagkakakilanlan.

Kaugnay nito, patuloy ang pakikipag-ugnayan ni Pampanga Governor Lilia “Nanay” Pineda sa Philippine Veterans Bank upang maayos ang mga natitirang lupa sa Aeta village na planong isama sa housing project ng Kapitolyo.

Sa isinagawang courtesy call, ibinahagi ni Jocelyn Root, Head ng Acquired Assets ng Philippine Veterans Bank, na nasa yugto na ng negosasyon ang pagitan ng Kapitolyo at ng bangko para maproseso at maipagkaloob ang mga lupang matagal nang hinihintay na matituluhan para sa mga katutubong Aeta.

Layunin ng nasabing hakbang na mabigyan ng mas maayos at ligtas na tirahan ang mga Aeta families, kasabay ng pagkilala sa kanilang karapatan sa lupaing ninuno at pagpapanatili ng kanilang komunidad.